बिमलेश कुमार झा
९ जेठ, रौतहट । कटहरिया नगरपालिकाको नवनिर्वाचित मेयर अजय प्रकाश जैसवालले पाँच वर्षको कार्यकाल नबित्दै कटहरिया नगरपालिकाको मुहार फेरिने बताएका छन्।
नेपाली काँग्रेसबाट कटहरियाको मेयरमा निर्वाचित जैसवालले सोमबार नगरपालिकाको कार्यभार सम्हाल्दै उनले सबभन्दा पुरानो बजार कटहरियालाई व्यवस्थित गर्ने बताएका छन्। जैसवालले रौतहटमै चर्चित बजारको रुपमा चिनिने कटहरियालाई सौन्दरीकरण गर्ने बताएका छन्।
जैसवाल सँगै निर्वाचित भएका सम्पूर्ण जनप्रतिनिधिहरुले समेत पद तथा गोपनियताको सपथ ग्रहण गरेका छन्।
कटहरिया नगरपालिका हरेक क्षेत्रमा पछाडि परेकाले पाच वर्षको कार्यकाल भित्र शिक्षा, स्वास्थ र सडक पूर्वाधारा लगायतका क्षेत्रमा ठूलो परिवर्तन गर्ने प्रतिबद्धता गरे।
पद भार सम्हालेको पहिलो दिन जैसवालले कटहरिया नगरपालिकामा पर्ने श्री जनता माविलाई कक्षा १ देखि १० सम्म अङ्ग्रेजी माध्यम बनाउने निर्णय गरे। अङ्ग्रेजी शिक्षा अहिलेको आवश्यकता रहेकाले सो विद्यालयलाई पूर्ण रुपमा व्यवस्थित गरि अङ्ग्रेजी माध्यम बनाइने जैसवालले प्रतिबद्धता गरे।
यसै बिच रौतहटको दुर्गा भगवती गाउपालिकाको नवनिर्वाचित जनप्रतिनिधिहरुले शपथ ग्रहण गरेका छन्। स्थानीय सरस्वती माध्यमिक विद्यालय पिपरा भलोहियामा आयोजित शपथ ग्रहण कार्यक्रममा नगर अध्यक्ष शम्भु सिंहले नगर उपप्रमुख र वडाध्यक्षका साथै वडा सदस्यहरुलाई मातृभाषा बज्जिकामा शपथ ग्रहण गराएका छन्।
शपथ ग्रहण गराउँदै अध्यक्ष सिंहले आफ्नोकार्यकालमा सम्पूर्ण नागरिकलाई राम्रो र प्रभावकारी ढंगले सेवा दिने प्रतिबद्धता व्यक्त गरेका छन्।
